Lappi Lihtu doaibma

Lappi Lihttu lea guvllolaš, politihkalaččat stivrejuvvon gieldaovttastupmi.

Lappi Lihttu vástida eanagotti guvllolaš ovddideamis ja eanagoddelávvaplánemis, jođiha riikkadási ja EU:a struktuvrafoanddaide guoskevaš ovddidanprográmmabarggu sihke doaibmá Kolarctic ENPI -prográmma hálddahuseiseváldin. Lihtu bargguide gullá maiddái lágidit eanagotti riikkaidgaskasaš ovttasbarggu. Dasa lassin Lihtus doaibmá Lappi gádjunlágádus, mii vástida eanagotti guvllolaš gádjundoaimmas.

Beroštumiid goziheapmi

Lappi Lihtu okta guovddáš doaibmasurggiin lea gozihit Lappi beroštumiid. Ná ovddidit eanagotti dáfus positiivvalaš mearrádusdahkama nu almmolaš go priváhta sektorisge. Beroštumiid goziheamis geahččalit váikkuhit stáhtabušehttii. Beroštumiid goziheamis Lihttu bargá ollu ovttas riikkabeaiáirasiiguin, gielddaiguin ja politihkalaš bireorganisašuvnnaiguin.

Doaibma

Lappi Lihtu vuođđudansoahpamuša mielde Lappi Lihttu doaibmá eanagotti, dan gielddaid ja ássiid beroštumiid ovdii ovddidan-, plánen-, dutkan- ja ávkegozihanáššiin.

Lihtu bargguide gullet:

1. Eanagotti ja dan gielddaid oktasaš beroštumiid vuodjin, vuoiŋŋalaš ja ávnnaslaš buorredili ovddideapmi sihke eanagotti gielddalaš-, sosiála-, dearvvasvuođa-, kultur-, skuvlen-, biras- ja ealáhusáššiid ovddideapmi searválagaid guovllu gielddaiguin.
   
2. Eanageavahan- ja huksenlága vuollásaš eanagoddeplánemis ja -lávvaplánemis vástideaddji gieldaovttastumi doaimmat.
   
3. Guovlluidovddidaneiseválddi barggut guovllupolitihkalaš láhkamearrádusaid mielde.
   
4. Guvllolaš gádjundoaimma lágideapmi gádjundoaimma guovlluid čohkkemis addojuvvon lága mielde.
5. Eará láhkamearrádusaid vuođul Lappi Lihttui gullevaš doaimmat.